Msanii na mfanyabiashara maarufu nchini Akothee, ametangaza kuwa anajenga shule ambayo watoto wanaotoka katika familia maskini wataweza kusoma bila malipo.

Akothee ameweka wazi taarifa hiyo kupitia ukurasa wake wa Instagram ambapo amesema kuwa alitoa ekari 7 za ardhi kupitia wakfu wake, Akothee Foundation kwa ajili ya ujenzi wa shule hiyo aliyoipa jina la Akothee Foundation Academy.

Mwanamama huyo amewahimiza mashabiki zake ambao kwa njia moja au nyingine wangependa kuwa sehemu ya kufanikisha ndoto zake zitimie wamtafute.

Kando na kutoa elimu bure, wanafunzi hao pia watapewa sare, kifungua kinywa na chakula cha mchana shuleni.

“Akothee Foundation Academy. Kutoa elimu bure kwa wasiojiweza. Wanafunzi wataoga shuleni, watavaa shuleni, watakula na kupata kifungua kinywa na chakula cha mchana shuleni bila malipo,” Akothee alisema.

Aliongeza, “Mwaka jana nilitoa ekari 7 za Ardhi kwa AKOTHEE FOUNDATION. Akothee foundation Academy kwenye Bodi. Nikizungumza, nafanya. Hii ndio ndoto kuu inayonisababishia kukosa usingizi usiku. Mapambano tarehe 10 Januari 2023… Ninapomaliza mradi sasa naweza kupumzika kwa amani. ”